ہندوستانی کرکٹرز کو سیکس کا مشورہ

ہندوستان کی کرکٹ ٹیم کی کارکردگی بہتر بنانے کے لیے کھلاڑیوں کو جنسی تعلقات بنانے کی تجویز دی گئی ہے۔ فی الوقت بھارتی کرکٹ ٹیم جنوبی افریقہ میں چیمپئنز ٹرافی میں حصہ لینے کے لیے گئی ہوئی ہے۔

اخبار ہندوستان ٹائمز ميں شائع ہونے والی ایک رپورٹ کے مطابق ٹیم کے کوچ گیری کرسٹن کی جانب سےکھلاڑیوں کو ایک خفیہ دستاویز دی گئی ہے جس کی سرخی ہے ’کیا سیکس کارکردگی بہتر بناتا ہے؟‘

اخبار کے مطابق اس کے جواب میں لکھا گیا ’ہاں‘ سکیس کے سبب کارکردگی بہتر ہوتی ہے اور اس لیے بنا جھجک اس میں مبتلا ہوں۔‘

دستاویز کے مطابق ’فزیولوجی کے لحاظ سے سکیس کرنے سے ٹیسٹوسٹرون میں اضافہ ہوتا ہے جس کے سبب طاقت، جارحیت اور مقابلہ کرنے کی قوت بڑھتی ہے۔

اسی طرح دستاویز میں جنسی تعلقات قائم نہ کر سکنے کی صورت کا حوالہ دیتے ہوئے بتایا گیا ہے کہ کئی مہینے تک اس سے محروم رہنے پر ٹیسٹوسٹرون کا لیول مردوں اور عورتوں دونوں میں ہی کم ہو جاتا ہے جس کے سبب جارحیت بھی کم ہو جاتی ہے۔

اس دستاویز میں یہ بھی کہا بتایا گیا ہے کہ اگر جنسی تعلقات قائم کرنے کے لیے کوئی ساتھی نہ ہو تو ایک طریقہ یہ بھی ہے کہ اکیلے ہی اپنے ساتھی کے ساتھ ہونے کو محسوس کرتے ہوئے اس عمل کو پورا کیا جائے۔

اخبار کے مطابق جنسی تعلقات کے علاوہ اس دستاویز میں خوراک، ملک کے سماجی تانے بانے اور خود پر یقین جیسے موضوعات کی بات کہی گئی ہے۔